༈ རྣམ་དཀར་དོན་ཀུན་གྲུབ་པའི་བླ་མ་ལ། །མོས་གུས་གསར་དུ་གཏོད་པའི་སློབ་བུ་ཡིས། །རེ་དོགས་མཐའ་ལས་གྲོལ་བའི་གུས་ཕྱག་འཚལ། །མཆོག་ཐུན་དངོས་གྲུབ་སྦྱིན་པའི་ཐུགས་རྗེ་གཟིགས། །གཞི་ནས་དམ་པ་ཁྱེད་ཀྱི་བཀའ་ལུང་བཞིན། །གཉན༌ས༌རི༌ཁྲོད༌འགྲིམ༌པའི༌ཕྱི༌གཅོད་ལ། །མི་ཚེ་ཧྲིལ་བུ་དྲིལ་བ་ཞིག་དགོས་ཀྱང་། །མ་ནུས་འགྱོད་བཤགས་འབུལ་ལ་ཐུགས་རྗེས་གཟིགས། །ད་ནས་ཕ་ཅིག་ཁྱེད་ཀྱི་དགོངས་པ་བཞིན། །ཕུང་པོ་གཟན་དུ་སྐྱུར་བའི་ནང་གཅོད་ལ། །ཆགས་ཞེན་འཁྲི་ནས་ཆོད་པ་ཞིག་བྱེད་ཀྱི། །བར་ཆད་སེམས་སུ་རྫོགས་པར་ཐུགས་རྗེས་གཟིགས། །གར་འདུག་ཨ་ནུ་དགོངས་པའི་གནས་ཡུལ་དེར། །ཉག་ཅིག་རྩད་ནས་བཅད་པའི་དོན་གཅོད་ལ། །སོམ་ཉིས་མེད་པའི་སྒྲོ་དོགས་ཤིག་གཅོད་ཀྱི། །གོལ་མེད་ལམ་དུ་གྲོལ་བར་ཐུགས་རྗེས་གཟིགས། །རྟགས་ཙམ་འཛིན་པའི་ཆོ་གར་མི་དད་ཀྱང་། །དྲིལ་བུ་ཌཱ་རུ་ཁྲོལ་བའི་དེང་གཅོད་ལ། །སྐལ་ལྡན་ཆོས་ལ་འཁྲིད་ཕྱིར་བདག་བརྩོན་གྱི། །འབྲེལ་ཚད་དོན་དང་ལྡན་པར་ཐུགས་རྗེས་གཟིགས། །རང་རྒྱུད་ཆོས་དང་འདྲེས་པར་ཐུགས་རྗེས་གཟིགས། །མན་ངག་གནད་དུ་ཟིན་པར་ཐུགས་རྗེས་གཟིགས། །ལག་ལེན་འཁྲུལ་པ་མེད་པར་ཐུགས་རྗེས་གཟིགས། །སངས་ཆུང་ནང་ནས་རྒྱ་བར་ཐུགས་རྗེས་གཟིགས། ། འདིའང་རང་གནས་ཨ་རིའི་མངའ་སྡེ་ནིའུ་ཧེམ་ཤར་རམ་འཆི་བདག་རང་གྲོལ་གྱི་གངས་ལྗོངས་སུ་བདུན་ཕྲག་ཅིག་གི་སྒྲུབ་པ་ལ་འགྲོ་དུས་སུ་རིག་འཛིན་སྐར་མས་སྨྲས་པ་ཛ་ཡནྟུ། །