༈ བླ་མ་མཁྱེན་ནོ། མ་དག་ཕུང་ཁམས་འཁྲུལ་པའི་རྫིང་བུ་རུ། །གང་འདུལ་སྒྱུ་འཕྲུལ་ཆུ་ཟླའི་གར་བསྒྱུར་ཀྱང་། །རྣམ་དག་སྐྱེས་མེད་དབྱིངས་ལས་མ་གཡོས་པ། །སྐུ་གསུམ་ཀུན་འདུས་བླ་མ་ཁྱེད་མཁྱེན་ནོ། །རྣམ་མང་ཕྱོགས་བཅུའི་ཞིང་ཁམས་རྒྱ་མཚོ་ན། །ཇི་སྙེད་རྒྱལ་དང་རྒྱལ་སྲས་བཞུགས་པ་ལ། །དེ་སྙེད་བདག་ལུས་རྣམ་པར་སྤྲུལ་པ་ཡིས། །ལུས་ངག་ཡིད་གསུམ་དྭང་བས་ཕྱག་འཚལ་ལོ། །འདོད་གཟུགས་དབྱིངས་སུ་ཕུན་ཚོགས་ཅི་ཡོད་དང་། །རྒྱལ་ཆེན་རི་བཞིའི་མངའ་ཐང་འབྱོར་པས་གཙོས། །བདག་ལ་ཅི་མཆིས་འཛམ་གླིང་ཟས་ནོར་ཀུན། །བློས་བླངས་ཡིད་སྤྲུལ་དངོས་སུམ་གཤོམ་པས་མཆོད། །བདག་གིས་ཚེ་རབས་འདི་འམ་གཞན་དག་ཏུ། །མི་དགེ་བཅུ་དང་འཚམས་མེད་ལྔ་ལ་སོགས། །སྡོམ་པ་དམ་ཚིག་ཉམས་པ་ཅི་བགྱིས་པ། །དེ་རིང་མི་སྦེད་ཀུན་ཀྱང་མཐོལ་ལོ་བཤགས། །ལམ་ལྔ་ས་བཅུ་རིམ་གྱིས་བགྲོད་པ་འམ། །ཐེག་མཆོག་རྒྱལ་པོའི་ལྟ་བ་སྤྱི་འབྱམས་ཀྱིས། །སྐད་ཅིག་གདོད་མར་རྫོགས་པའི་རྣམ་དཀར་སོགས། །རིག་འཛིན་མཛད་པ་ཀུན་ལ་རྗེས་ཡིད་རངས། །རྔ་ཡབ་གླིང་དང་འོག་མིན་ཞིང་གིས་གཙོས། །ལྷ་མིའི་གྲོང་དང་དག་པའི་ཞིང་ཀུན་ཏུ། །རྒྱལ་དང་རྒྱལ་སྲས་ཇི་སྙེད་བཞུགས་པ་ལ། །ཨ་ཏིའི་ཆོས་འཁོར་བསྐོར་བར་བདག་གིས་བསྐུལ། །སངས་རྒྱས་བྱང་སེམས་རིག་པ་འཛིན་པ་དང་། །བསྟན་པའི་སྲོག་ཤིང་དགེ་བའི་བཤེས་གཉེན་སོགས། །ཐ་ན་ངུར་སྨིག་སྐོན་པ་ཙམ་ལ་ཡང་། །འཁོར་བ་མ་སྟོང་བར་དུ་བཞུགས་སུ་གསོལ། །སྐྱེ་བ་འདི་དང་ཚེ་རབས་ཐམས་ཅད་དུ། །ཟག་བཅས་ཟག་མེད་བསོད་ནམས་ཡེ་ཤེས་ཀྱི། །དགེ་ཚོགས་ཇི་སྙེད་བདག་གིས་བསགས་པ་རྣམས། །འགྲོ་ཀུན་རྣམ་མཁྱེན་འཐོབ་པའི་རྒྱུ་རུ་བསྔོ། ། ཞེས་པའང་དད་ལྡན་གཡུ་སྒྲོན་མའི་ངོར་རིག་འཛིན་རྒྱུ་སྐར་དབང་པོས་སོ། །