༈ རྗེ་བླ་མ་རྣམ་དཀར་དོན་གྲུབ་མཁྱེན། །ལྷ་བཛྲ་སྭ་ཏུས་བྱིན་གྱིས་རློབས། །གྲོགས་བློ་གཏེར་དབྱངས་ཅན་དངོས་གྲུབ་སྩོལ། །ཆོས་ཨ་ཏི་ཡོ་ག་མཐར་ཕྱིན་ཤོག །ང་ན་ནིང་ཤི་ན་འགྱོད་པའི་རྒྱུ། །དལ་འབྱོར་སྟོང་ཟད་དུ་སོང་བ་ལགས། །གཏན་འདུན་གྱི་རྨང་གཞི་མ་འདིང་བར། །མུན་ནས་མུན་སོང་དེ་ཨ་ཙ་མ། །ང་ད་ལོ་གསོན་པས་མི་སྡུག་རྒྱུ། །གཉུག་མའི་རྒྱལ་ས་འདོད་པ་ལགས། །ཨ་བྷི་རཱ་ཏི་ཡི་བཞུད་སྣ་འཛིན། །སྣང་ནས་སྣང་བགྲོད་དེ་ཨ་ལ་ལ། །ང་སང་ཕོད་མ་འཆི་དོན་གོ་ཆོད། །བདེ་གསལ་མི་རྟོག་བསྒོམ་པ་ལགས། །གཉིད་རྨི་སད་གསུམ་དེ་སྐུ་གསུམ་དུ། །རང་བསྲེ་རང་གྲོལ་དུ་ཨེ་མ་ཧོ། །ང་ཁ་སིང་ཤི་ན་འགྱོད་ཙམ་ལགས། །ལམ་གྱི་འོད་གསལ་དེ་གཅུན་ནས་གདའ། །སྐུ་བཞིའི་བར་དོ་རུ་འཁྲུལ་ཡང་སྲིད། །གདོས་ལུས་སུ་འཇུག་ན་ཀྱེ་མ་ཧུད། །ང་དེ་རིང་ཤི་ན་འགྱོད་མེད་ལགས། །རྗེ་བླ་མའི་གདམས་ངག་དྲིན་དུ་ཆེ། །སེམས་འོད་གསལ་དག་པའི་སྒྱུ་ལུས་ཀྱི། །རང་རྡོ་རྗེ་སེམས་དཔར་ལྡང་ནས་འགྲོ །ང་སང་ཉིན་མ་འཆི་བདེ་བ་ལགས། །ནང་སྐྱེ་མེད་ཆོས་སྐུའི་རང་ཞལ་ལྟ། །ཕྱི་འགག་མེད་ལོངས་སྐུའི་བདེ་ཆེན་མྱོང་། །བར་གནས་མེད་སྤྲུལ་སྐུའི་འགྲོ་དོན་བྱ། ། ཨེ་མ༑ ཕྱི་རོལ་སད་ཉམས་འདི་འཕྱོ་ན་འཕྱོ། །གསལ་སྟོང་བྱ་གྲུབ་ཀྱི་ཡེ་ཤེས་ལགས། །ཚུལ་ཁྲིམས་རྣམ་དག་གི་གཟུང་བ་ཟད། །སྤྲུལ་སྐུ་ཡི་ཐུགས་རྗེས་ཟིན་ཏེ་ཐལ། །ནང་དུ་རྨི་ལམ་འདི་འཁྲུལ་ན་འཁྲུལ། །བདེ་སྟོང་སོར་མཉམ་གྱི་ཡེ་ཤེས་ལགས། །ཏིང་འཛིན་ཡང་དག་གི་འཛིན་པ་ཟད། །ལོངས་སྐུ་ཡི་རང་བཞིན་མྱོང་སྟེ་ཐལ། །གསང་བར་གཉིད་རྨུགས་འདི་འཐིབ་ན་འཐིབ། །རིག་སྟོང་ཆོས་དབྱིངས་ཀྱི་ཡེ་ཤེས་ལགས། །ཤེས་རབ་ཕུལ་བྱུང་གི་ཟག་པ་ཟད། །ཆོས་སྐུ་ཡི་ངོ་བོ་རིག་སྟེ་ཐལ། །ལར་སྐུ་གསུམ་སད་རྨི་གཉིད་དུ་རྫོགས། །དུག་གསུམ་ཡེ་ཤེས་གསུམ་དུ་ཟད། །འཁོར་དང་མྱང་འདས་དབྱེར་མེད་རིག །གསོན་རིན་ཆོག་སྙམ་ཞིག་འདི་ན་གདའ། །ངེའི་སྒྱུ་མའི་ལུས་ཀྱི་ཕུང་པོ་འདི། །མ་འཇིག་ད་ཐུག་འཚོ་བའི་རིང་། །བཟང་འབྲེལ་ངན་འབྲེལ་ཐོགས་ཚད་ཀུན། །སངས་མཉམ་དུ་རྒྱ་བའི་སྨོན་ལམ་ཞུ། ། ། །ཞེས་པའང་གནམ་བསྙེགས་ཨར་འདམ་གྱི་བྲག་རོང་དུ། མཁའ་འགྲོ་གསང་བ་ཡེ་ཤེས་ཀྱི་ཚོགས་འཁོར་ལ་རོལ་ཏེ། ཉམས་དྲོད་ཀྱི་བདེ་ཚོར་མེར་མེར་དུ་འཁྱིལ་བའི་དུས་ཤིག་ན། རིག་འཛིན་རྒྱུ་སྐར་གྱི་དབང་པོས་གང་བདེ་ཅི་བདེར་སྨྲས་པའོ། །
Updated on 08/10/23.
