༈ ཀ་དག་འོད་གསལ་ལྷུན་གྱིས་གྲུབ་པའི་ཀློང་། །ཁ་དོག་དྲི་མེད་ནམ་མཁའི་རྩལ་རྫོགས་ཏེ། །ག་ཆེན་གདོད་མའི་རྒྱལ་སར་དབང་བསྒྱུར་བ། །ང་ཡི་བླ་མ་རྣམ་དཀར་དོན་གྲུབ་མཁྱེན། །ཅ་ཟིང་ཨ་རི་ཡུལ་ན་འདུ་འཛིའི་ངང་། །ཆ་ཆོའི་དགེ་སྦྱོར་ཙམ་ཡང་མ་འབྱོར་ཞིང། །ཇ་ཀོག་དལ་རྟེན་མཉམ་དུ་སྟོང་ཁད་པའི། །ཉ་ཉོར་དོ་མེད་འདི་ལ་ཐུགས་རྗེས་གཟིགས། །ཏ་ན་ག་ནར་འགྲིམ་པའི་སྐབས་མེད་ཀྱང་། །ཐ་མལ་གཅེར་ཉལ་སོས་དལ་མི་བྱེད་པར། །ད་རེ་སྡོད་པའི་ཕྱི་གླིང་ག་ལ་བར། །ན་མར་ཆོས་སྤྱོད་ནུས་པར་་བྱིན་གྱིས་རློབས། །པ་ར་ཕྱིན་པའི་ཤིང་རྟ་ལ་བརྟེན་ནས། །ཕ་མེས་ཁྱེད་ཀྱི་རྣམ་ཐར་མ་འཁྱོང་བར། །བ་ཛ་ཧི་རའི་དད་དམ་འགྱུར་མེད་ཀྱིས། །མ་ཆད་གསོལ་བ་འདེབས་པའི་རྗེས་སྐུལ་ཞུ། །ཙ་མདངས་གཏུམ་མོའི་མན་ངག་མ་འཐོབ་ཀྱང་། །ཚ་གྲང་ལྟོགས་སྐོམ་གཟེར་ལ་མི་ཞུམ་པར། །ཛ་དྲག་ཁྱགས་རོམ་རི་ཁྲོད་གངས་ཁྲོད་དུ། །ཝ་ལེར་བགྲོད་པའི་སྙིང་སྟོབས་མྱུར་དུ་སྩོལ། །ཞ་སྒྲེར་བདུད་ཀྱིས་བསླུས་ནས་རྨོངས་པ་འམ། །ཟ་ཟེད་རྐྱེན་གྱི་འཁྲུག་ལོང་འཚུབ་དྲགས་ཏེ། །འ་ཆད་འུ་ཐུག་རྣལ་འབྱོར་ལམ་གོལ་ན། །ཡ་བོར་བུལ་མིན་ཐུགས་རྗེས་ཅིས་ཀྱང་གཟིགས། །ར་གཏུགས་རྡོ་རྗེ་ཐེག་པའི་མན་ངག་དང་། །ལ་ལ་ཙམ་མིན་ཡོ་ག་རྣམ་གསུམ་སོགས། །ཤ་ཚ་ཌ་ཀིའི་སྙིང་ཐིག་ལ་བསྟེན་ནས། །ས་ལམ་མཐའ་རུ་ཕྱིན་པར་བྱིན་གྱིས་རློབས། །ཧ་ཅང་གདུང་ངོ་ཐུགས་རྗེ་ཆུ་ཟླའི་སྐུ། །ཧ་གོར་གྲོལ་ལོ་རང་བཞིན་བདུད་རྩིའི་གསུང་། །ཨ་དོན་རྗེན་གསལ་ངོ་བོ་རང་རིག་ཐུགས། །ཨ་ནུའི་གདུང་བས་དྲན་ནོ་ཁྱེད་རང་མཁྱེན། །ཨི་ཐི་སྙིང་པོའི་དོན་ཆེན་མ་རིག་བར། །ཨུ་ནན་རྒྱུན་མི་ཆད་པའི་ཉམས་ལེན་གྱིས། །ཨེ་ཝཾ་ཟུང་འཇུག་ཚེ་འདིར་རྟོགས་གྱུར་ཏེ། །ཨོ་རྒྱན་ཞིང་དུ་རིང་མིན་འཁྲིད་འཚལ་ལོ། ། ། །ཞེས་པའང་རིག་འཛིན་རྒྱུ་སྐར་དབང་པོས་སོ། ། སརྦ་མངྒ་ལཾ། །
Changed to dynamic perspective on 11/17/2023.
