༈ ཀ་དག་གདོད་མའི་དབྱིངས་དེ་ཆོས་སྐུ་ཡི་ངོ་བོ། །ཁ་དོག་མཛེས་མའི་ཁྱུ་དེ་ལོངས་སྐུ་ཡི་རང་བཞིན། །ག་ལའང་ཕྱོགས་ལྷུང་མེད་དེ་སྤྲུལ་སྐུ་ཡི་ཐུགས་རྗེ། །ང་ཡི་བླ་མ་སྐུ་གསུམ་ཀུན་འདུས་དེ་མཁྱེན་ནོ། །ཅ་ཅོའི་མཚན་ཉིད་སློབ་པ་རྟོག་གེ་བའི་ལམ་རིང་། །ཆ་ཆོའི་དགག་སྒྲུབ་རྩོད་པ་ངག་ཁྱལ་གྱི་མགོ་རྙོགས། །ཇ་ཡུན་ཙམ་ཡང་མི་ལོངས་ད་ལྟ་རང་བཤོལ་ཏེ། །ཉ་གང་གནམ་སྟོང་དབྱེར་མེད་ཏིང་འཛིན་ལ་གཞོལ་འགྲོ །ཏ་ན་ག་ནའི་རི་ལ་གཅིག་པུ་རུ་སོང་སྟེ། །ཐ་སྙད་ཚད་ཕེབས་མེད་པའི་བླུན་སྒོམ་གྱིས་ཅི་བྱེད། །ད་ཀོ་འདུག་པའི་ཕྱི་གླིང་འོག་མིན་དུ་རིག་སྟེ། །ན་རེ་དགོང་རེར་མཁའ་འགྲོའི་འདུ་བ་རུ་སྤྱོད་འགྲོ །པ་གིར་མི་གདའ་ལྷུན་གྲུབ་རིག་འཛིན་གྱི་གོ་འཕང་། །ཕ་ཟད་གཉུག་མའི་གཤིས་ལ་ཡེ་བབས་སུ་འདུག་པས། །བ་ཆ་ལུག་གུ་རྒྱུད་པའི་སྣང་ཞེན་དེ་གཅོད་ནས། །མ་དང་མཁའ་འགྲོ་དགྱེས་པའི་ཚོགས་འཁོར་ལ་རོལ་འགྲོ །ཙ་རི་ཏྲ་སོགས་མིང་ཅན་གངས་ཆེན་གྱི་གནས་དང་། །ཚ་ཁུལ་ཆར་ནགས་དུ་མ་རོ་ཅིག་ཏུ་འདུག་ན། །ཛ་གལ་རི་ཁྲོད་ལོགས་སུ་འགྲིམ་དགོས་ཤིག་མིན་འདུག །ཝ་ལེར་སྲིད་ཞི་མཉམ་བརྡལ་རྗེས་ཐོབ་ཏུ་བཞག་འགྲོ །ཞ་མཆག་སྐྱོན་ཟད་དལ་རྟེན་ས་བརྟོལ་གྱི་སྟེང་ནས། །ཟ་བསོད་ཙམ་མིན་ཆོས་སྤྱོད་ཡིད་དགའ་རུ་བཞད་པས། །འ་ཅག་འཆི་མེད་འདོད་འཇོའི་འབྲས་བུ་འདི་སྨིན་ཚེ། །ཡ་མཚན་གཞོན་ནུའི་བུམ་སྐུ་དེ་ཀར་རང་འགྲུབ་ཡོང་། །ར་གཏུགས་མན་ངག་སྙིང་ཐིག་ཡ་བཞི་ལ་འདུས་པས། །ལ་གཏམ་ལུང་གཏམ་ཐོས་བསམ་བྱ་ཁུལ་གྱིས་ཅི་བྱེད། །ཤ་སྟག་གནམ་འཕང་ཆོད་པའི་མན་ངག་ལ་བསྟེན་ནས། །ས་ལམ་གོལ་འཕྱུག་མེད་པའི་རྣལ་འབྱོར་དུ་འདོང་འགྲོ །ཧ་གིའི་རྒྱལ་བ་རིགས་ལྔ་རང་ཉིད་ལ་ཡོད་དུས། །ཧ་ཅང་རྒྱང་ནས་འཚོལ་བའི་རྩོལ་སྒྲུབ་ཀྱིས་ཅི་བྱེད། །ཨ་ལེ་འབྱུང་ཁམས་དུག་ལྔ་རང་སངས་ཀྱི་རིག་འཛིན། །ཨ་ཏི་ཡོ་གར་རྫོགས་པའི་རྣལ་འབྱོར་དེ་ཧེ་ཧེ། །ཞེས་པའང་སྙིགས་མཐའི་རིག་འཛིན་རྒྱུ་སྐར་དབང་པོས་ཡོན་བདག་ཨ་ནཱན་དའི་ནང་ནས་འཆལ་གཏམ་དུ་སྨྲས་པའོ། །
Updated on 06/05/2023.
