༈ སྐྱབས་དཀོན་མཆོག་གསུམ་ལ་ཕྱག་འཚལ་ལོ། །མགོན་རྩ་བ་གསུམ་པོ་ཁྱེད་རང་མཁྱེན། །དཔུང་དམ་ཅན་རྒྱ་མཚོས་སྡོང་གྲོགས་མཛོད། །གཉེན་ཆོས་མཐུན་མཛའ་མོ་གླུ་འདིར་གསོན། །དུས་ད་ནངས་ཚེས་པ་བཅུ་བཞི་ལ། །མཛའ་གྲོགས་ཀྱི་ཉིན་མོ་འུར་སྒྲ་ཆེ། །ཁྱེད་གདུང་སེམས་ཀྱི་སྐད་འཕྲིན་བསྐུར་བ་ལ། །ང་དགའ་སྐྱོ་འདྲེས་མའི་ཚོར་སྣང་བྱུང། །ལོ་ན་ནིང་ད་གཟོད་ཡས་མས་ལ། །རིང་འདྲིས་ཀྱི་གྲོགས་རྙིང་རླུང་གིས་ཁྱེར། །རང་གཅིག་པུར་ས་སྟེང་ལྷགས་པ་ལས། །མཛའ་གདུང་གི་བརྩེ་འཕྲིན་འཇལ་ལེན་མེད། །རང་ཆོས་པ་ཡིན་དུ་བརློམ་བརློམ་ཀྱང་། །སེམས་ཆོས་དང་གཏིང་དུ་མ་འདྲིས་པས། །འཁྲུལ་སྣང་གི་གདུང་བ་འགོག་མ་ཐུབ། །ཐ་མལ་གྱི་སྣང་ཞེན་ཧར་གྱིས་ལྡང་། །ལོ་ན་ནིང་ཤིན་ཏུ་ཉེས་པའི་ལོར། །ང་སློབ་དཔོན་དང་པོ་མི་མཇལ་དུ། །ཁོང་ཆགས་ཞེན་འཁྲི་གཅོད་ཀྱི་སློབ་དཔོན་མཇལ། །སྟོང་ཉིད་སྙིང་རྗེ་ཡི་གདམས་ངག་ཐོབ། །ང་སློབ་དཔོན་གཉིས་པ་མི་མཇལ་དུ། །ཞེ་རུས་གཏིང་སྐྱེད་ཀྱི་སློབ་དཔོན་མཇལ། །ཐམས་ཅད་བློས་གཏོང་གི་འབུལ་བ་ཕུལ། །རང་མཚང་རང་བརྟག་གི་གདམས་ངག་ཐོབ། །ང་སློབ་དཔོན་གསུམ་པ་མི་མཇལ་དུ། །མི་རྟག་འཆི་ངེས་ཀྱི་སློབ་དཔོན་མཇལ། །ཞབས་བརྟན་གསོལ་འདེབས་ཀྱི་འབུལ་བ་ཕུལ། །ལོངས་མེད་རྒྱུད་སྐུལ་གྱི་གདམས་ངག་ཐོབ། །སྐྱེས་པའི་ཡུལ་འཁྲུལ་གྱི་སྐྱོ་གདུང་ཅིག །བསླབ་པའི་ཡོན་ཏན་གྱི་ནོངས་སེམས་གཉིས། །ཐམས་ཅད་བསུན་གཙེར་གྱི་ཚོར་བ་གསུམ། །བློ་སེམས་ཆོས་བསྐུལ་གྱི་གྲོགས་སུ་ཤར། །ད་འདི་སྣང་ལིང་གིས་སྐྱུར་ནས་ཀྱང་། །བོད་ཁ་བ་ཅན་གྱི་ས་འཚམས་ན། །དཔལ་ཆུ་དབར་སྤྲུལ་སྐུའི་ཕོ་བྲང་ན། །དུས་ད་ལྟ་འགྲོ་འམ་སྙམ་པའི་ཚེ། །སྣང་གྲགས་དྲིན་ཅན་གྱི་བླ་མ་ལ། །རིག་པ་པད་འབྱུང་གིས་དགོངས་བརྟག་ཞུས། །ལར་དབྱེན་ཁྲོད་འགྲིམ་འདོད་ལེགས་ལགས་ཀྱང་། །དུས་ད་རེས་མ་འགྲོ་ཤོལ་དང་གསུངས། ། (Portion Redacted) ངས་བློ་ལྡོག་རྣམ་བཞིའི་ཆོས་བཤད་པས། །ཁྱོད་ངེས་འབྱུང་སྐྱོ་ཤས་ཀྱི་མཆི་མ་འཁྲུག །ངས་ཐམས་ཅད་བློས་གཏོང་གི་གྲོས་བྱས་པས། །ཁྱོད་མཉམ་འགྲོགས་མཉམ་འདོང་གི་མདུན་མ་བཤད། །ང་སུ་ལའང་བློ་གཏད་མི་འཆའ་བས། །སོམ་ཉིས་ཀྱི་དྲ་བར་འཆིང་བའི་ཚེ། །ཁྱོད་དད་དམ་གྱི་སྒྲུབ་བྱེད་བསྟན་ནོ་ཟེར། །ཆོས་བྱེད་ཀྱི་མཐུན་རྐྱེན་སྒྲུབ་བོ་ཟེར། །ཁྱོད་ལྟ་ན་གཟུགས་བྱད་མཛེས་པ་དེས། །སྙིང་སྡུག་གི་ཕུལ་དུ་ཕྱིན་པ་འདྲ། །ཁྱོད་བློ་སེམས་ཆོས་ལ་དཀར་བ་དེས། །མཁའ་འགྲོ་ཡི་སྤྲུལ་པ་ག་ལ་མིན། །ཁྱོད་དང་པོ་མཐོང་བས་སྐལ་བ་ལྡན། །གཉིས་པ་མཛའ་བས་བསོད་ནམས་ཆེ། །གསུམ་པ་བསུན་མེད་ཀྱི་དམ་བཅའ་བརྟན། །ཚེ་འདི་ཕྱི་གཏན་གྱི་གྲོགས་སུ་བཟང༌། །ལར་ཐམས་ཅད་བསམ་ཞིང་གཞིག་པ་ན། །ལོ་ན་ནིང་མི་ཉེས་ན་ནིང་ལེགས། །ལོ་ན་ནིང་ཆོས་ལ་བསྐུལ་བའི་ལོ། །རྐྱེན་གྲོགས་སུ་ཤར་བའི་ལོ་རུ་བཟང་། །ལོ་དུས་ཅི་མི་ཉེས་དུས་ཅིག་ལེགས། །ལོ་དུས་ཅིག་ཁྱོད་དང་མཛའ་བའི་ལོ། །བརྩེ་གདུང་གི་རོལ་རྩེད་རྒྱས་པའི་ལོ། །བདག་གཞན་གཉིས་སྨན་གྱི་ལོ་རུ་བཟང་། །ལོ་སང་ཕོད་མི་ཉེས་སང་ཕོད་ལེགས། །ལོ་སང་ཕོད་ཚེ་རིང་ནད་མེད་ལོ། །མཐུན་རྐྱེན་ཕུན་སུམ་ཚོགས་པའི་ལོ། །བསྟན་འགྲོར་སྨན་པའི་ལོ་རུ་བཟང༌། །ད་ངེད་ཅག་མཆོག་གསུམ་འཛིན་པའི་ས། །རྩ་གསུམ་དངོས་གྲུབ་སྩོལ་བའི་ཞིང་། །ཚེ་རིང་ནད་མེད་ཀྱི་ལྗོན་ཤིང་ལ། །འདོད་རྒུ་ཡི་འབྲས་བཟང་སྨིན་པར་ཤོག །སྤྱིར་མཛའ་མཐུན་ཡོངས་ལ་བཀྲ་ཤིས་ཤོག །སྒོས་རང་ཅག་གཉིས་ལ་བཀྲ་ཤིས་ཤོག །སྤྱིར་བསྟན་འགྲོ་ཡོངས་ལ་བཀྲ་ཤིས་ཤོག །སྒོས་འབྲེལ་ཚད་ཀུན་ལ་བཀྲ་ཤིས་ཤོག །   ། །ཅེས་པའང་ཕྱི་ལོ་༢༠༢༥ འི་མཛའ་གྲོགས་ཀྱི་ཉིན་མོཪ་ མཁའ་འགྲོ་ཆོས་སངས་བདེ་འཁྱིལ་ལ་ ཨར་འདམ་བྲག་རོང་གི་རི་ཁྲོད་ རང་སྣང་འོད་གསལ་སྤྲིན་གྱི་སྐྱེད་ཚལ་ནས་ རིག་འཛིན་སྐར་མས་ཕུལ་བ་དགེ་ལེགས་སུ་གྱུར་ཅིག ། སརྦ་མངྒལཾ། །