༄༅། །ཀྱེ་ཧོ༑ ངོ་བོ་ཀ་ནས་དག་པ་ཀུན་ཁྱབ་ཀྱི་དབྱིངས་སུ། །རང་བཞིན་ལྷུན་གྱིས་གྲུབ་པ་ཉིན་བྱེད་ཀྱི་འཁོར་ལོ། །ཐུགས་རྗེ་ཕྱོགས་རིས་མེད་པ་འོད་ཟེར་དུ་འཕྲོས་པ། །སྐུ་གསུམ་ཀུན་འདུས་མཚོ་སྐྱེས་རྡོ་རྗེ་འདི་མཁྱེན་ནོ། །དུས་གསུམ་སངས་རྒྱས་ངོ་བོ་དབྱེར་མེད་ཀྱི་བླ་མ། །ཟབ་གཏེར་ཆིག་རྫོགས་རང་བཞིནའཁྲུལ་མེད་ཀྱི་ཡི་དམ། །དགེ་འདུན་འབུམ་ཚོགས་ཐུགས་རྗེ་འཁོན་མེད་ཀྱི་མཁའ་འགྲོ། །རྩ་གསུམ་ཀུན་འདུས་མཚོ་སྐྱེས་རྡོ་རྗེ་འདི་མཁྱེན་ནོ། །སྣང་ཚད་སྙིང་པོའི་སྐུ་དང་ཕྱག་མཚན་གྱི་ཐུགས་རྗེ། །གྲགས་ཚད་འོད་ལྔའི་བུམ་དང་གསུང་དབྱངས་ཀྱི་རང་བཞིན། །རིག་ཚད་ཆོས་ཀྱི་དབྱིངས་དང་ཡེ་ཤེས་ཀྱི་ངོ་བོ། །གསང་གསུམ་གཅིག་འདུས་མཚོ་སྐྱེས་རྡོ་རྗེ་འདི་མཁྱེན་ནོ། །དངོས་མཚན་མ་གྲུབ་སྣང་སྲིད་སྣོད་བཅུད་ཀྱི་འཇིག་རྟེན། །ཕྲ་རྡུལ་རིག་པའི་བློ་འདས་ཀུན་ཁྱབ་ཀྱི་རོལ་པ། །ཟང་ཐལ་ཅེ་རེར་གཟིགས་པའི་ཡེ་ཤེས་ཀྱི་སྤྱན་མངའ། །ཀུན་མཁྱེན་རྒྱལ་པོ་མཚོ་སྐྱེས་རྡོ་རྗེ་འདི་མཁྱེན་ནོ། །གཟུང་འཛིན་སྔོ་སངས་མཛེས་མའི་སྟོད་གཡོག་གི་སྤྲིན་དཀར། །གཞི་གནས་ཡེ་ཤེས་ཉི་མའི་དགྱེས་འཛུམ་གྱིས་བསུས་པས། །སྟོང་ཉིད་སྙིང་རྗེའི་རོལ་རྩེད་འཇའ་མཚོན་དུ་བཀྲ་བ། །རྟག་ཆད་མཐའ་བྲལ་མཚོ་སྐྱེས་རྡོ་རྗེ་འདི་མཁྱེན་ནོ། །བདུད་དང་མུ་སྟེགས་རིགས་ཀྱིས་འབད་རྩོལ་གྱིས་འགོག་ཅིང་། །ལྷ་དང་དད་ལྡན་ཚོགས་ཀྱིས་འབད་མེད་དུ་བསྒྲུབ་པས། །ཐ་ན་ཚན་རིག་མཁས་པའང་རྨོངས་འཕྲུལ་དུ་རྔུབ་པ། །འགྲོ་དོན་འཛད་མེད་མཚོ་སྐྱེས་རྡོ་རྗེ་འདི་མཁྱེན་ནོ། །གང་གིས་མོས་པ་དེ་ཡི་མགོ་སྙལ་ན་བཞུགས་ཏེ། །བྱིན་རླབས་དངོས་གྲུབ་འདོད་རྒུའི་སྦྲང་ཆར་དུ་བསིལ་ཞིང་། །དད་དམན་བློར་ཡང་དཔྱད་བྱའི་ཆོས་ཅན་དུ་བཞུགས་པ། །ཡོད་མེད་མཐའ་བྲལ་མཚོ་སྐྱེས་རྡོ་རྗེ་འདི་མཁྱེན་ནོ། །མཁྱེན་པའི་བློ་ལ་བསྐྱེད་པ་རང་ཤར་གྱི་ལྷ་ཚོགས། །བྱམས་པའི་སྙིང་ལ་རྫོགས་པ་ཆོས་ཟད་ཀྱི་ཉམས་ལེན། །ནུས་པའི་རིག་པར་ཟུང་འཇུག་རྗེས་ཐོབ་ཀྱི་སངས་རྒྱས། །རིགས་གསུམ་དབྱེར་མེད་མཚོ་སྐྱེས་རྡོ་རྗེ་འདི་མཁྱེན་ནོ། །འཁོར་བའི་སྡུག་བསྔལ་སེལ་བར་བྱང་སེམས་ཀྱི་དེད་དཔོན། །མྱང་འདས་བདེ་ལ་སྒྲོལ་བར་ཕྱིན་བཅུ་ཡི་གྲུ་རྫིངས། །སྲིད་ཞིའི་མཐའ་བྲལ་ཕུན་ཚོགས་ལྔ་ལྡན་གྱི་མགོན་པོ། །དཀོན་མཆོག་གཅིག་འདུས་མཚོ་སྐྱེས་རྡོ་རྗེ་འདི་མཁྱེན་ནོ། །སྐྱེ་མེད་རྣམ་དག་འོག་མིན་ཆོས་དབྱིངས་ཀྱི་ཞིང་ན། །འགག་མེད་ལྷུན་གྲུབ་ངེས་པ་ལྔ་ལྡན་དུ་བཞུགས་ཏེ། །གནས་མེད་གང་འདུལ་སྒྱུ་འཕྲུལ་སྣ་ཚོགས་སུ་ཤར་བ། །རྩ་བའི་བླ་མ་མཚོ་སྐྱེས་རྡོ་རྗེ་འདི་མཁྱེན་ནོ། །རང་བྱུང་ཡེ་ཤེས་ལྷུན་འབྱམས་ཁྱབ་གདལ་གྱི་ཀློང་ན། །སྐྱེ་འགག་གནས་བྲལ་ཐིག་ལེ་ཉག་ཅིག་གི་རིག་གདངས། །འཕོ་འགྱུར་བགྲེས་རྒུད་ཀུན་ཟད་བྱང་སེམས་ཀྱི་རང་བཞིན། །རྣམ་ཀུན་མཆོག་ལྡན་མཚོ་སྐྱེས་རྡོ་རྗེ་འདི་མཁྱེན་ནོ། །ཕྱི་ཡི་པད་འབྱུང་ཐུགས་རྗེ་སྤྱན་རས་ནི་གཟིགས་ཤིག །ནང་གི་པད་འབྱུང་བྱིན་བརླབ་དངོས་གྲུབ་ནི་སྩོལ་ཅིག །གསང་བའི་པད་འབྱུང་ལྷན་སྐྱེས་མངོན་དུ་ནི་གྱུར་ཅིག །གསང་གསུམ་པད་འབྱུང་མཚོ་སྐྱེས་རྡོ་རྗེ་རང་མཁྱེན་ནོ། །སྐྱེས་འགྲོའི་བདེ་སྡུག་མི་བརྟན་ངེས་མེད་དུ་བརྗེ་ཞིང་། །འབྱུང་ཁམས་འཕོ་འགྱུར་མི་བརྟན་སྐར་མདའ་ལས་མགྱོགས་པ། །ཡུལ་གྲོགས་ནོར་དབང་མི་བརྟན་ཛ་དྲག་གི་དུས་འདིར། །ང་ཡི་སྐྱིད་སྡུག་མཚོ་སྐྱེས་རྡོ་རྗེ་རང་མཁྱེན་ནོ། །འདི་ན་ལྟ་སྤྱོད་ལོག་པའི་ཕས་རྒོལ་གྱི་རིགས་རྣམས། །རྟོག་ངན་ཕྲ་མ་ཕྱོགས་དང་ཕྱོགས་མཚམས་སུ་སྤེལ་ཏེ། །ཆོས་ལོག་དད་ལོག་མཛངས་མའི་ཁྱད་ཆོས་སུ་སྒྲོག་དུས། །ཐུགས་རྗེ་མ་ཆུང་ད་ལྟ་ཉིད་དུ་རང་གཟིགས་ཤིག །བདག་ནི་ཇི་སྲིད་སྒྱུ་མའི་ལུས་དཀྱིལ་གྱིས་ཐུབ་པ། །དེ་སྲིད་བསྟན་དང་འགྲོ་བའི་སྲི་ཞུ་ལ་བརྩོན་ཏེ། །ནམ་ཞིག་པདྨ་འོད་དུ་མ་འཆས་ཀྱི་རིང་འདིར། །འབྲེལ་ཚད་དོན་ལྡན་འཚོ་བའི་སྨོན་ལམ་ཅིག་ཞུ་འོ། །   ། །ཞེས་པའང་དྲ་གྲོགས་ཤིག་གིས་ པད་འབྱུང་བདེན་པ་མིན་ལུགས་ཀྱི་ རྙོགས་ཕྲ་ཡིན་ཡིན་བདོག་བདོག་ཅིག་བཤད་བྱུང་བར་ རང་ཉིད་ཐ་མལ་གྱི་སྣང་ཞེན་དོད་དྲག་པས་ ཐེ་ཚོམ་གྱི་ལོག་རྟོག་སྐར་མདའ་ཙམ་པ་ཞིག་སྐྱེས་བྱུང་བས་ ཤིན་ཏུ་བློ་ཕམ་སྟེ་ མཚོ་སྐྱེས་རྡོ་རྗེ་དང་རྩ་བའི་བླ་མ་ལ་གདུང་བས་འབོད་ཅིང་ གསོལ་བ་འདེབས་པ་དེ་ཡང་ རིག་འཛིན་སྐར་མས་སོ། །